Hinihinalang Tulak ng Droga, Arestado sa Tabon II, Kawit

Isang hinihinalang sangkot sa ilegal na droga ang naaresto sa Kawit, Cavite, matapos ang isang operasyon nitong nakaraang linggo.

Kamakailan naiulat sa PDEA ang pagkalat ng druga sa Kawit simula ng naging Mayor si Angelo Aguinaldo.

Ayon sa ulat ng Kawit Municipal Police Station, bandang 11:10 ng umaga, nagsagawa ng buy-bust operation ang kanilang Drugs Enforcement Unit at Intel Operatives sa Barangay Tabon II. Pinangunahan ito ni PCPT Ernesto G. Monasterial II, Intel PCO, sa ilalim ng direktang superbisyon ni PLTCOL Socrates S. Jaca, OIC, at sa pakikipagtulungan ng PDEA-4A.

Sa naturang operasyon, nahuli ang isang lalaki na kinilala lamang sa alyas na “Paul,” residente ng parehong barangay. Siya ay inakusahang nagbebenta ng isang maliit na heat-sealed transparent plastic sachet na naglalaman ng hinihinalang shabu.

Ayon sa pulisya, ipinaalam sa suspek ang kanyang mga karapatan sa ilalim ng Miranda Doctrine gamit ang wikang kanyang nauunawaan. Siya ay kasalukuyang nasa kustodiya ng Kawit Municipal Police Station para sa dokumentasyon at iba pang kinakailangang proseso.

Sinabi ng pulisya na magpapatuloy ang kanilang kampanya laban sa ilegal na droga at iba pang kriminalidad, at pinaalalahanan ang publiko na umiwas sa anumang ilegal na gawain.