COA: Hindi Sumunod ang Kawit LGU sa Paggamit ng P58.6M Relief Goods noong Pandemya

Kawit, Cavite – Inihayag ng Commission on Audit (COA) na hindi sumunod sa mga alituntunin ang Bayan ng Kawit sa pagtatala at pamamahagi ng mga relief goods na nagkakahalagang P58,683,667.99 para sa mga apektadong residente dahil sa COVID-19 pandemya noong 2020, sa ilalim ng administrasyon ng dating Alkalde Angelo Aguinaldo.

Ayon sa annual audit report ng COA para sa taong 2020, na inilathala sa kanilang opisyal na website, nabigo ang lokal na pamahalaan sa tamang pagtatala ng mga biniling welfare goods bilang imbentaryo bago ito i-expense sa oras ng pamamahagi.

Sa halip, direktang naitala ang mga ito bilang outright expense sa ilalim ng mga account tulad ng “Other Supplies and Materials Expense” (Account No. 5-02-03-990) at “Welfare Goods Expenses” (Account No. 5-02-03-060), na lumalabag sa COA Circular Nos. 2014-002 at 2015-009.

“Hindi naaayon sa mga nabanggit na COA Circulars at sa wastong gawi ng accounting dahil hindi kinikilala ang halaga ng mga item ng imbentaryo bilang assets bago itong i-record bilang expense sa pag-issue o pamamahagi,” ayon sa report.

Dagdag pa rito, walang naipasa ang Municipal General Services Office (MGSO) at Municipal Social Welfare and Development Office (MSWDO) ng Report on Supplies and Materials Issued (RSMI), na kailangan para sa tamang pagsuporta sa mga transaksyon.

Bukod dito, kulang ang mga suportaing dokumento tulad ng listahan ng mga tatanggap, buod ng pamamahagi bawat barangay, at iskedyul ng nilalaman ng food packs, na nagresulta sa hindi pagkakaalam kung ganap na napamahagi ang mga relief goods sa mga residente.

“Ang tamang pagtatala ng mga resibo, issue, at balanse ng mga welfare goods na binili ay hindi nafacilitate dahil sa nabanggit na kakulangan,” dagdag ng COA, na nagresulta sa hindi pagkakaalam ng tamang paggamit ng pondo.

Hanggang ngayon, walang opisyal na tugon mula sa opisina ni dating Alkalde Aguinaldo o sa kasalukuyang pamunuan ng Kawit kaugnay ng report. Ang COA ay nananawagan ng agarang aksyon upang maiwasan ang mga katulad na isyu sa hinaharap, lalo na sa panahon ng mga krisis tulad ng pandemya.

Ang report ay bahagi ng mas malawak na pagsusuri ng COA sa mga lokal na yunit ng gobyerno upang matiyak ang transparensya at accountability sa paggamit ng pampublikong pondo. Para sa buong detalye, maaaring bisitahin ang website ng COA.