KAWIT, CAVITE — Isiniwalat ng Commission on Audit (COA) na may kabuuang P67,283,219.78 ang ginastos ng Pamahalaang Bayan ng Kawit para sa mga goods at serbisyo kaugnay ng COVID-19 operations noong 2020 na hindi dumaan sa wastong dokumentasyon at proseso ng procurement, batay sa ulat ng audit.

Sa ilalim ng COA report, lumabag umano ang LGU ng Kawit sa mga probisyon ng Republic Act No. 11469 (Bayanihan to Heal as One Act) at sa mga patakaran ng Government Procurement Policy Board (GPPB) Circular No. 01-2020.

Ilan sa mga dokumentong kulang o hindi naisumite ay ang Omnibus Sworn Statement (OSS), Business o Mayor’s Permit, at Income Tax Return — mga pangunahing requirement sa emergency procurement.

Hindi lamang ito. Ayon sa COA, marami sa mga disbursement vouchers (DVs) ng mga transaksyon mula Marso hanggang Disyembre 2020 ay walang kalakip na Purchase Request, Price Quotations, Official Receipts, Delivery Receipts, Inspection and Acceptance Report, at iba pang kinakailangang dokumento.

Sa ilang kaso, kulang pa sa pirma at detalye ang mga isinumiteng papeles.

Binanggit sa ulat na ito ay tahasang paglabag sa Sections 4.5 at 4.6 ng Presidential Decree 1445, na nagsasaad na ang paggasta ng pondo ng bayan ay kailangang suportado ng kumpletong dokumentasyon at may pahintulot ng wastong mga opisyal.

Ang masaklap, sa kabila ng malinaw na kakulangan sa dokumento, ay patuloy pa ring naiproseso at nabayaran ang mga claim, na ayon sa COA ay nagdudulot ng “pagdududa sa bisa at integridad ng mga transaksyon.”

Bilang punong ehekutibo ng bayan ng Kawit, si Mayor Angelo Aguinaldo ang may pangunahing pananagutan sa pamamalakad ng pondo ng bayan.

Ang ganitong uri ng kapabayaan o katiwalian ay isang malinaw na anyo ng pag-abuso sa kapangyarihan sa panahon ng krisis kung kailan higit na kailangan ng mamamayan ang tapat at maayos na serbisyo mula sa pamahalaan.

Inaasahan ngayon ng taumbayan ang agarang imbestigasyon at pagsasampa ng kaukulang kaso kung mapatutunayang may naganap na iregularidad at korapsyon sa pamahalaang lokal ng Kawit sa ilalim ng pamumuno ni Mayor Aguinaldo.