KAWIT, CAVITE – Isiniwalat ng Commission on Audit (COA) na nabigo ang Pamahalaang Bayan ng Kawit sa ilalim ni Mayor Angelo Aguinaldo na maabot ang target nitong kita para sa taong 2020, kung saan umabot sa nakakabahalang P99,488,391.01 ang hindi nakolektang kita.

Bunga nito, nagtapos ang taon sa malaking cash deficit na P98,900,999.41 – senyales ng malubhang kakulangan sa pamamahala ng pananalapi at posibleng katiwalian sa lokal na pamahalaan ni Aguinaldo.

Ayon sa ulat, tanging 60.69% lamang ng inaasahang kita mula sa lokal na buwis at non-tax revenue ang nakolekta, katumbas ng P153.5 milyon mula sa target na P253 milyon.

Ayon sa COA, tanging ang “Other Income and Receipts” lang ang lumagpas sa inaasahan – posibleng indikasyon ng maling pagtantiya o pagmamaniobra ng datos.

Nabunyag na Kapalpakan ng Local Finance Committee
Tinukoy ng COA ang Local Finance Committee ng Kawit sa hindi nito pagtupad sa tungkulin nitong tukuyin ang makatotohanang projected income para sa taon, taliwas sa Section 316(a) ng Republic Act No. 7160 o Local Government Code.

Ang kapabayaang ito ay nagdulot ng cash overdraft, bagay na tahasang ipinagbabawal ng batas.

Paglabag sa RA 7160: Posibleng Ilegal ang Paglalaan ng Pondo
Sa ilalim ng Section 337 ng RA 7160, malinaw na ipinagbabawal ang overdraft o ang paglalabas ng pondo na lampas sa aktwal na koleksyon.

Ngunit sa kaso ng Kawit, naglabas ang pamahalaan ng mga pondong walang sapat na salaping backup, at ginamit pa ang mga pondo na nakalaan sana para sa disaster response (LDRRMF) at development fund.

Saan Napunta ang Bilyon-Bilyong Pondo?
Lumilitaw rin sa report na mayroong P127.3 milyon na kabuuang current liabilities habang tanging P39.9 milyon lamang ang cash and cash equivalents.

Bukod pa rito, nagkaroon ng deficit na P22.2 milyon sa pagitan ng kabuuang kita (P348.9 milyon) at kabuuang gastusin (P371.1 milyon) para sa taong 2020.

Katiwalian at Kawalang-Disiplina ang Nakikitang Ugat
Ayon sa ilang lokal na tagamasid, ang mga numerong ito ay patunay ng matagal nang problema sa transparency at accountability sa pamahalaang lokal ng Kawit.

Isang residente ang nagsabing, “Bakit taon-taon ay may ganitong deficit? Saan napupunta ang pera ng bayan?”

Nanawagan ang COA ng masusing imbestigasyon, kabilang ang posibilidad ng pananagutan ng mga opisyal ng Local Finance Committee, Budget Officer, at mismong Local Chief Executive o Mayor.